Skrifkritiese teoloë beweer Obadja was 'n tipiese nasionalistiese profeet wat in die hitte van 'n politieke twis hierdie woorde neergeskryf het. Tog kry 'n mens soortgelyke uitsprake by verskeie
ander profete van die Ou Testament. Amos, Jesaja sowel as Jeremia en Esegiël maak soortgelyke oordeelsuitsprake oor Edom!
Die feit van die saak is dat Juda en Edom in 'n voortdurende stryd gewikkel was. Edom was jare lank aan Israel onderdanig. Hulle welvaart was grootliks aan die van Juda gekoppel. En Edom wou
graag hierdie juk afgooi! Hulle wou nie van Juda afhanklik wees nie!
Om hierdie weerstand by Edom te verstaan, moet 'n mens terug tot by die stamvaders. Ons ken mos die geskiedenis. Jakob het mos met bedrog die seën wat sy tweelingbroer Esau moes kry, gesteel. Hy het homself mos by sy ou blinde vader Isak, as Esau voorgedoen.
Toe hy vir Jakob in Esau se plek geseën het, het Isak gesê:
"Wees 'n heerser oor jou broers, en die seuns van jou moeder moet hulle voor jou neerbuig" (Gen. 27:29)
Toe Esau later daar aankom om geseën te word, het Isak vir hom gesê:
"En van jou swaard sal jy lewe, en jou broer sal jy dien. Maar as jy jou kragte inspan, sal jy sy juk van jou nek afruk."(Gen. 27:40)
Hier sien 'n mens die rede waarom die Edomiete gedurig teen Israel en Juda in opstand was!
Waar die Here van broers verwag om in liefde en vrede saam te leef, was hier net sprake van haat en twis. Waar kom dit vandaan?
Natuurlik van Jakob en Esau se sonde! Al was Jakob die stamvader van Israel, was hy die een wat gelieg en bedrieg het. Hy was alles behalwe die engeltjie sonder sonde.
Hy moes ook maar eers ʼn pad loop. Die pad deur sy oom Laban se huis en later by sy terugkeer deur die Jabbok rivier. Eers daar het hy met God geworstel en om genade en God se seën gesmeek. Maar tog was hy die oorsaak van Esau se wraakgedagtes en sodoende die Edomiete se wraaklus.
Ons elkeen moet versigtig lewe sodat ons nie met ons optrede ander mense negatief oor die kerk en oor Christenskap maak nie. Te veel kerkmense skrik met hulle sondige optrede mense af om na der aan die kerk te kom.
Die probleem is:
2. SONDE BRING SKEIDING TUSSEN BROERS
Die Satan blaas die vuur van die mens se sondige natuur aan! Die stryd wat tussen die tweelingbroers, Jakob en Esau ontbrand het, het voortgewoed.
Edom het net waar hy kan met die vyande van Israel en Juda saamgewerk. En elke keer wanneer 'n ander vyandige volk Israel binnegeval het, het Edom sy broer in die rug gesteek!
Die hoogtepunt van hierdie rugstekery het gekom toe die Babiloniërs in die jaar 587 vC Jerusalem binnegeval het. Die Edomiete het grynslaggend toegekyk en selfs gehelp om Juda te verneder.
Hulle het van die Judeërs wat ontvlug het gevang en aan die Babiloniërs oorgelewer om tereggestel te word. (Lees gerus weer verse 13 en 14)
Edom het die verraaier van Israel geword. Die rugsteker wat verheug was oor die ondergang van Sion! En Edom was Israel se bloedbroer en sy geloofsbroer.....
Tog, broeders en susters, hier is meer in as bloot net nasionale verraad.
Hierdie verraad is om 'n bepaalde rede gepleeg. Ons moet die groter prent sien.
Ons het mos al die lyn tot by Jakob en Esau teruggetrek. Kom ons vat
nou die lyn weer van daar af vorentoe in die geskiedenis.
U onthou mos nog die tyd toe Dawid so vir die waansinnige Saul moes vlug. In 1 Sam 22 lees ons dan van Doëg wat aan Saul vertel het dat Dawid by die priesters van Nob brood en 'n swaard gekry
het. Toe gaan Saul mos om al die priesters in Nob dood te maak. Toe Saul se manskappe nie die opdrag, om die priesters dood te maak, uitvoer nie. Toe is dit op die ou end Doëg wat die priesters
doodmaak! Hierdie Doëg was 'n Edomiet! Die stryd duur voort. En let op wie bly in die slag. Die priesters van die Here!
Opvallend is die feit dat Edom, die bloedbroer en geloofsbroer, voortdurend in die hande van die magte van die duisternis speel! Hulle is nie openlik vyandig nie, nee, hulle is die wolf in
skaapsklere.
Edom, die broer, wat selfs in die vergadering van die Here, maw in die kerk, toegelaat is, is die rugsteker!
Vandag sien 'n mens dieselfde gebeur. Is dit nie juis sogenaamde christene wat die grootste skade aan die koninkryk van God aanrig nie? Wanneer die moderne teoloë die gesag van die Skrif in twyfel
trek of wanneer duidelike Skrifuitsprake as outyds en onvanpas afgemaak word, dan is dit mos deel van hierdie stryd. Dis die magte van die duisternis wat aan die werk is!
As die Wêreldraad van kerke deesdae poog om selfs die Islam en die Hindoeïsme onder dieselfde sambreel saam met die Christelike kerke in te trek, is dit mos deel van hierdie stryd! Geloofsbroers wat die rugstekers word! Die kerk van die Here word deur mense wat hulleself gelowiges noem, uitmekaar geskeur!
Wat is die oplossing?
3. WAAR GOD REGEER, DAAR IS VREDE
Kyk na die stryd agter die stryd!
Hierdie stryd het op die aarde begin reeds met die sondeval. Kyk na die stryd tussen Kain en Abel. En tussen Jakob en Esau. Dit woed voort as Doëg die priesters van die Here doodmaak. Saul is waansinnig, gedryf deur 'n bose gees, agter Dawid aan. Waarom? Dawid moet dood, want dit is uit sy nageslag wat die Christus gebore moes word.
Kyk ook na die Nuwe Testament. Toe Christus gebore is, laat Herodes al die seuntjies onder twee jaar doodmaak. Weer dieselfde stryd. Die Christus moes dood. En wie was Herodes? Hy was 'n
Edomiet! Die broer van Juda!
En meer nog. Elke keer as daar in die Bybel na Judas, die verraaier van Jesus verwys word, dan word daar bygevoeg dat hy Judas Iskariot is. Dws 'n man van Keriot. Keriot is in Edumea geleë. Weereens Edom! Die bloedbroer, die geloofsbroer, die rugsteker!
Sien u waarom die oordeel so skerp oor Edom uitgepreek word? Edom laat toe dat die satan hom misbruik. Hy wat dieselfde agtergrond het, is die skeurmaker.
Sien u wie sit agter hierdie stryd? Die Satan en sy bose magte.
En vandag word dieselfde taktiek toegepas. Die Satan gebruik mense wat as volksgenote en geloofsgenote bekendstaan (bloedbroers en geloofsbroers) om die aanvalle teen God se volk te rig. Hierdie stryd is 'n hewige stryd.
Maar ons moet nie te gou moedeloos word nie. Onthou, die Here regeer! Dit wat Hy sê, dit is wat uiteindelik gebeur.
In vers 21 lees ons: "Die bevrydes op Sionsberg sal optrek om oor die bergland van Esau te regeer"
Die Here gee hierdie bevryding. Sionsberg, die tempelberg in Jerusalem, is simbolies vir die heerskappy van God. En uiteindelik ook die oorwinning in Christus. Hy regeer. Hy het mos alle mag in die hemel en op die aarde. En Hy het belowe dat Hy by ons is tot met die voleinding van die wêreld!
Saul en Doëg se priestermoord kon Dawid nie stuit nie. Herodes se kindermoord kon Christus nie stuit nie. Selfs Judas se verraad kon die oorwinning deur Christus nie verhoed nie.
SLOT
Ons het die duidelike bewyse dat God in beheer is. Dat die poorte van die hel nie die kerk van die Here sal oorweldig nie. Laat ons aan die beloftewoord van die Here vashou. Waar Hy regeer is daar vrede. In ons persoonlike lewe en in sy kerk.
AMEN.
