Regardt Venter – GKSA Krokodilrivier
Skriflesing:Rom 8:14-17
Fokus vers:Rom 8:16 Hierdie Gees getuig saam met ons gees dat ons kinders van God is.
Tema: Die Heilige Gees getuig saam met ons gees dat ons kinders van God is.
Inleiding:Somtyds wonder kinders of hulle regtig hulle ouers se kind is. Dalk omdat hulle fisies anders lyk en anders redeneer as hulle ouers en hulle broers en susters. By sommige ontstaan selfs die gedagte dat hulle moontlik in die hospitaal omgeruil kan wees. Wanneer hulle dan hulle ouers uitvra, soek hulle na getuienis dat hulle wel in hulle gesin tuishoort. Dikwels is ’n eenvoudige versekering genoeg, ander kere word die twyfel die hok geslaan wanneer daar verwys word na sekere familietrekke of persoonlikheidseienskappe wat dalk nie in die ouers en ander kinders teenwoordig is nie, maar in ’n oupa of ouma.
Die opregte gelowige kom een of ander tyd op ’n plek in sy lewe dat hy ook wonder of hy werklik ’n kind van God is. Veral wanneer hy worstel met sondige gedagtes en gedrag wat dikwels blyk die oorhand te kry. Paulus skryf hier aan die gelowiges in Rome wat vroeër meestal die Joodse godsdiens aangehang het en aan alle gelowiges wie hierdie brief later sou lees. Hy getuig in hoofstuk 7 van sy eie worsteling met die wet en die sonde wat nog in hom woon, maar hy dank God vir die verlossing wat hy in Christus ontvang het.
In hoofstuk 8 skryf hy oor die die twee uiteenlopende wyses van lewe. Om deur die sondige vlees beheer te word, of om onder leiding van die Heilige Gees te leef. In die gelese gedeelte praat Hy oor die rol van die Heilige Gees om ’n getuie te wees van ’n gelowige se kindskap. God verseker deur Paulus se brief gelowiges dat hulle wel sy kinders is, al worstel hulle soms met hulle eie sondige vlees. Die Heilige Gees gee as getuie bewyse wat die gelowiges gerus te stel dat hulle wel God se kinders is maar om hulle ook aan te spoor om uit hierdie identiteit as kind van God te leef.
Ons worstel vandag nog met ons sondige aard wat aanleiding gee tot ’n kwynende oortuiging dat ons kinders van God is. Ons het ’n goeie getuie nodig om saam met ons te kom getuig sodat die onsekerheid uit die weg geruim kan word.
Reg deur die eeue word goeie getuies se hulp ingeroep om in die hof die ware feite in herinnering te roep sodat almal onder die korrekte indruk van die gebeure kan kom.
In ons verhouding met God is die Heilige Gees hierdie getuie, sodat ons getuienis versterk kan word om te leef as gehoorsame kinders van God.
Uit Romeine 8 sien ons eerstens....
1) Die Heilige Gees se inwoning getuig van ons kindskap.
Paulus skryf in die fokus vers dat die Heilige Gees se getuienis oor hulle kindskap saam met hulle gees se getuienis plaasvind. Die gelowiges getuig dus reeds dat hulle kinders van God is. Om die sleutelrol van die Heilige Gees in hierdie getuienis te verstaan is dit belangrik om te weet dat die mens geensins uit homself die getuienis van kindskap kan ontwikkel nie. Die rede hiervoor is omdat die mens geestelik dood is as gevolg van die sonde. Paulus stel hierdie feit duidelik in sy brief aan die Efesiërs:
Ef. 2:1 Julle was dood as gevolg van julle oortredings en sondes
Hy herinner die gelowiges dat hulle eers geestelik dood was. Soos lyke kon hulle niks vir hulleself doen nie. Hulle kon nie eers reageer op die roepstem van God nie wat nog te sê worstel of getuig oor hulle kindskap. Maar God het hulle nie so gelos nie, Hy het hulle lewend gemaak.
Ef. 2:5 Deur sy groot liefde het Hy ons wat dood was as gevolg van ons oortredings, saam met Christus lewend gemaak.
God maak mense wat geestelik dood is lewend saam met Christus. Jesus Christus het die uitverkorenes se geestelike en fisiese dood op Hom geneem toe Hy aan die Kruis sterf. Maar God het Hom uit die dood opgewek deur die Heilige Gees en wek die uitverkorenes op deur dieselfde Gees. As gevolg daarvan dat God ons opgewek het uit die dood kan ons geestelik reageer op God deur onder andere te getuig dat ons sy kinders is.
Die Heilige Gees wek nie alleen die gelowiges uit die dood op nie, maar woon in hulle. Rom 8:11 Omdat die Gees van Hom deur wie Jesus uit die dood opgewek is, in julle woon, sal Hy deur wie Christus uit die dood opgewek is, ook julle sterflike liggame lewend maak deur sy Gees wat in julle woon.
In die Nuwe Testament praat Jesus met Nikodemus en verduidelik hierdie lewend making deur die Heilige Gees met ’n tweede geboorte, ’n weergeboorte. Dit is ’n geestelike geboorte. In hierdie geestelike geboorte word die geestelike dooie mens lewendig gemaak. Selfs ons eens dooie wil word lewend gemaak om gewillig en gehoorsaam God se wil te doen. Alles vind plaas omdat die Heilige Gees in ons kom woon het.
Iemand wat geestelik dood is, is glad nie bekommerd oor die Here of sy gebooie nie. Die bekommernis of onsekerheid is in wese ’n sterk getuienis dat ons lewendig gemaak is deur die Heilige Gees en dat Hy in ons woon en werk. Daarom is God se wil vir ons belangrik. Daarom worstel ons met ons sondige natuur en begeer ons om oorwinning oor ons swakhede te verkry. Só getuig die Gees saam met ons gees van ons kindskap.
Verder sien ons...
2) Die Heilige Gees se leiding getuig van ons kindskap.
Die gelowiges in Rome moes verstaan dat daar nog ’n bewys is dat hulle God se kinders is. Deur wie hulle hulself laat lei openbaar wie se kinders hulle is. Wanneer hulle hul laat lei deur die Heilige Gees wat in hulle woon dan is hulle kinders van God.
Daarom skryf Paulus.....
Rom 8:13-14 As julle julle lewe deur die sondige natuur laat beheers, gaan julle die dood tegemoet, maar as julle deur die Gees ‘n einde maak aan julle sondige praktyke, sal julle lewe. (14) Almal wat hulle deur die Gees van God laat lei, is kinders van God.
Diégene wat hulle deur hulle sondige natuur laat beheer is nie geestelik lewend nie en gaan die fisiese en ewige dood tegemoet. Maar diégene wat hulle deur die Gees van God laat lei is kinders van God. Hulle reaksie op die Heilige Gees se leiding is om in stryd te tree met hulle sondige praktyke en dit te beveg met die doel om ’n einde daaraan te maak.
Hierdie begeerte om op te hou met sonde kom nie uit die mens self nie. Die gewone sondige mens het geen begeerte om op te hou met sonde nie. Die begeerte om n einde te maak aan die sondige praktyke is ’n sterk getuienis van die Heilige Gees se lewend making en inwoning.
Paulus skryf hierdie “laat lei” in vers 14in die die teenwoordige tyd. Hierdie leiding vind dus oomblik vir oomblik plaas, maar impliseer dat die kind van God ’n aandeel en verantwoordelikheid het om hom te laat lei. Paulus beklemtoon ons verantwoordelikheid sterker in vers 12 ....
Rom 8:12 Daarom dan, broers, staan ons onder ‘n verpligting, maar nie teenoor ons sondige natuur om daarvolgens te lewe nie.
Die verantwoordelikheid van die kind van God om hom te laat lei kan deur Herderskap verduidelik word. Die tradisionele herders in die Bybelse tyd het anders as hier by ons, waar skape aangejaag word, voor hulle skape geloop om hulle te lei. Alhoewel daar verskeie herders in dieselfde omgewing sou wees sou die skape nie toelaat dat hulle deur ’n vreemde herder gelei word nie. Indien hulle dit sou toelaat sou hulle in verkeerde hande beland. Hulle sou hulle laat lei deur die herder wat hulle vertrou.
Deur wie laat ons ons lei? Dit openbaar wie se kinders ons is. Óf jy is ’n kind van God wat deur die Heilige Gees gelei word, of ’n kind van die verderf wat jou deur jou sondige vlees laat verlei, mislei en oorheers.
Daarom is die Heilige Gees se daaglikse leiding ’n bewys wat getuig van ons kindskap, maar ook ’n duidelike opdrag waaraan die kind van God oomblik vir oomblik gehoorsaam moet wees. Paulus skryf daaroor in Galasiërs:
Gal 5:16 Laat julle lewe steeds deur die Gees van God beheers word, dan sal julle nooit swig voor begeertes van julle sondige natuur nie.
Die wat hulle nie deur die Gees laat lei nie gee hulle oor aan die praktyke van die sondige natuur.....
Gal 5:19-21 Die praktyke van die sondige natuur is algemeen bekend: onsedelikheid, onreinheid, losbandigheid, afgodsdiens, towery, vyandskap, haat, naywer, woede, rusies, verdeeldheid, skeuring, afguns, dronkenskap, uitspattigheid en al dergelike dinge.
Die wat hulle deur die Heilige Gees laat lei sal in stryd tree met die praktyke van die sondige natuur en deur die leiding en in staat stelling van die Heilige Gees, sy vrugte voort te bring.
Gal 5:22-23 Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing.
Alhoewel die leiding van die Heilige Gees aktief plaasvind in die kinders van God se lewens, struikel ons steeds dikwels deur toe te gee aan die sondige begeertes van die vlees. Vir daardie doel moes Jesus Christus in ons plek die volmaakte lewe kom leef. Hy is deur die Heilige Gees gelei, selfs om versoek te word deur die duiwel maar sonder enige sonde. Hy neem die doodstraf vir ons ongehoorsaamheid op Hom en ons word vrygespreek van die straf vir ons sonde en misstappe. Sy volmaakte gehoorsaamheid word aan ons toegereken asof ons self volkome gehoorsaam was.
Ons is dus aan God verskuldig om ons te laat lei al struikel ons dikwels. Wanneer ons glo in die inwoning en leiding van die Heilige Gees dan word ons innerlike oortuiging in ons uiterlike optrede geopenbaar. Dan is my lewe ’n getuienis van die Heilige Gees se leiding.
.
Laastens .....
3) Die Heilige Gees wat ons verhouding tot God verander getuig van ons kindskap.
Die Gees wat God gegee het om in sy kinders te woon was heeltemal anders as die gees waaraan hulle gewoond was. Hy het die uitverkorenes se verhouding met God drasties verander. Ons lees vers 15 se weergawe in die Ou Vertaling....
Rom 8:15 Want julle het nie ontvang ‘n gees van slawerny om weer te vrees nie, maar julle het ontvang die Gees van aanneming tot kinders, deur wie ons roep: Abba, Vader!
Voorheen was godsdiens beoefen in ’n gees van slawerny. Godsdienstiges het God probeer dien deur die wet na te kom. Hoe meer hulle probeer het om die wet van God te gehoorsaam, hoe minder het hulle daarin geslaag, omdat die mens van nature tot sonde geneig is. Die verhouding met God was in ’n gees van slawerny en vrees. Die gelowige was gedryf om die regte dinge te doen. Daarom was die verhouding koud en formeel.
God gee aan die uitverkorenes die Heilige Gees om hulle as sy kinders aan te neem. Die gelowiges wat eers in ’n slaaf – God verhouding was word nou aangenome kinders van dieselfde God.
Aanneming was onder die Grieke en Romeine nie iets vreemds nie. Selfs ’n slaaf sonder enige familie bande kon as seun aangeneem word waarna hy die naam van die vader sou aanneem en as eie kind hanteer is op alle terreine. Selfs wat die erfporsie aan betref.
Wanneer daardie slaaf kind gemaak word, dan verdwyn die vrees en word hy nie meer gedryf nie, maar as kind en erfgenaam is daar nou ’n persoonlike en intieme verhouding. Hierdie nuwe verhouding kom duidelik in die aanspreekvorm na vore. Die aangenome slaaf spreek sy baas as vader aan. Verder is die kind deel van die familiebesigheid en werk nou met ’n ander gesindheid. Hy doen nie meer net die nodigste nie, maar wy spontaan meer tyd en energie aan die take wat verrig moet word omdat hy nie meer werk vir ’n loon nie, hy is mede-eienaar en begunstigde.
Wanneer die Heilige Gees ons verhouding met God verander deur ons wat eers slawe was sy kinders te maak dan verdwyn die vrees. Ons word nie meer gedryf om sekere opdragte slaafs uit te voer nie, maar omdat ons deel is van God se koninkryk doen ons die take met ’n heeltemal ander ingesteldheid. Ons doen nie meer werke vir God om beloning te kry nie, maar ons doen die werke waartoe die Gees ons lei omdat ons reeds begunstigdes en erfgename is.
Hierdie verandering in ons verhouding met God word weerspieël in die wyse en die gesindheid waarmee ons Hom aanspreek. Die Gees laat ons roep ABBA, Vader! ABBA is ’n informele Aramese woord vir vader. Amper soos om te sê “pappa” en dui op kinderlike intimiteit en vertroue.
Hierdie “roep” dui nie op ’n dis respekvolle geskreeu nie, maar ’n roep uit die hart wat getuig van kinderlike afhanklikheid.
Jesus leer sy dissipels bid deur God aan te spreek as “Vader”. So leer hulle om Hom persoonlik te vertrou vir beskerming, voorsiening, leiding en vergifnis. Maar Jesus spreek God self as ABBA aan in sy swaarste stryd op aarde. Ons lees in ......
Mar 14:36 Hy het gesê: "ABBA, Vader, alles is vir U moontlik. Neem hierdie lydensbeker van My af weg. Moet nogtans nie doen wat Ek wil nie, maar wat U wil."
Jesus het sy Vader as enig gebore Seun aangeroep, omdat Hy moes ly vir ons sonde. Dit was in God se raadsplan om baie te red. In hierdie diepste wroeging met die taak wat Hy moes vervul sien ons ’n kinderlike vertroue en afhanklikheid maar terselfdertyd ’n bereidheid om te ly sodat die uitverkorenes gered kan word.
Die volgende dag met Jesus se kruisiging is van sy laaste woorde aan die kruis voor Hy sy laaste asem uitblaas....
Mat 27:46 "Eli, Eli, lemá sabagtani?" Dit is: My God, my God, waarom het U My verlaat?
Hy beleef hoe sy verhouding van informeel en intiem toe Hy kon bid “Abba Vader” verander na die formele, “My God, My God, waarom het U My verlaat?” Hy beleef in ons plek die verwydering sodat ons in sy plek die intieme verhouding met God kan verkry.
Jesus Christus het duur betaal sodat die Heilige Gees van ons God se kinders kan maak, sodat ons intiem tot God kan roep...Abba Vader. So beleef ons sy sorg, beskerming, liefde, geduld. Die Heilige Gees kom herstel ons verhouding met God Hy is nou onse Vader vir ewig.
Al is God ook ons Vader, beteken dit nie dat alles op hierdie aarde voorspoedig gaan verloop nie. Die teendeel is waar. God laat ons lewenspaaie deur moeilike tye gaan, maar die feit dat ons kan berus in sy wil ten spyte van lyding en teëspoed, is seker ons gees se duidelikste getuienis van ons kindskap.
So het ons deel geword van die Koninklike familie met ’n ewige erfporsie. Ons is nie nie meer die slawe wat eers in vrees met ons beste pogings teleurgestel het nie, maar ons is vrygespreekte kinders wat in ’n intieme verhouding met God is en spontaan sy koninkryk eerste stel al moet ons ly.
Slot: Het u dalk gewonder oor u kindskap? Het jou sondige aard jou in onsekerheid gedompel? Was jy op soek na onomstootlike bewyse dat jy ’n kind van God is?
Nou kan jy verseker weet. God het vir ons ’n sleutelgetuie gegee om saam met ons gees te getuig. Die Heilige Gees.
· Sy inwoning is die bron van ons gees se getuienis. Hy woon reeds in jou en het jou lewend gemaak, daarom bekommer jy jou oor jou vleeslike optrede en sonde. Daarom begryp jy waarom Jesus aan die kruis moes sterf. Sonder die Heilige Gees se inwoning en werking kan ons nie bekommerd wees oor sonde nie.
· Dat ons ons daagliks deur die Gees laat lei om in die stryd te tree met ons sondige praktyke en die begeerte te hê om dit te oorwin is ’n verdere bewys dat ons sy kinders is. Ons gehoorsaamheid aan hierdie leiding kom duidelik na vore in ons woorde en dade en dien só as ’n getuienis dat ons kinders van God is.
· En laastens.....Die wyse waarop ons verhouding met God deur die Heilige Gees verander is bewys ons kindskap. Die Heilige Gees het van ons wat eers as slawe vêr verwyder was van God sy aangenome kinders gemaak. Christus het die verwydering in ons plek beleef sodat ons ’n intieme Vader – kind verhouding kan beleef.
Hierdie getuienis van die Heilige Gees is die bron en versterking van ons eie getuienis sodat ons nie meer sal twyfel in ons kindskap nie. Noudat God ons deur sy Woord verseker dat ons sy kinders is, is ons verplig om as sy aangenome kinders te leef. Om nie vas te kyk in ons menslike swakheid nie, om nie meer te vrees soos slawe nie, maar om ons te laat lei deur die Heilige Gees. Om as mede-erfgename van Christus selfs te ly om God se wil en koninkryk eerste te stel.
