1. WAT HET GOD BELOWE?
Toe die Here destyds vir Abram uit Ur van die Galdeërs geroep het, het Hy met hom ʼn verbond gesluit. Hierdie verbond was ʼn ooreenkoms wat die Here met Abram aangegaan het. Ons lees daarvan in Gen. 17:7 ev
Ek bring ʼn verbond tot stand tussen My en jou en jou nageslag en al hulle geslagte. Dit is ʼn blywende verbond: Ek sal jou God wees en ook die God van jou nageslag. .... Verder het God vir Abraham gesê: Jy moet my verbond nakom, jy en jou nageslag en al hulle nageslagte. En dan sê die Here dat hierdie verbond met die besnydenis as verbondsteken bevestig moet word.
En toe, op Pinksterdag, net na die uitstorting van die Heilige Gees, praat Petrus onder leiding van die Heilige Gees met die mense in Jerusalem. En het u gehoor? Hy praat dieselfde taal! Hy praat ook oor ʼn belofte wat God maak! Hy sê dat dit wat God belowe vir hulle is en vir hulle kinders en almal wat daar ver is...
Die inhoud van die belofte is dieselfde as aan Abraham: Ek sal jou God wees en ook die God van jou nageslag. Maw Ek sluit ʼn verbond met jou. Dit is die belofte van die Drie-Enige God. In die doopformulier hoor ons die inhoud van die belofte: Ons Vader wat ons met alle goeie dinge wil versorg. Ons Here Jesus Christus wat ons met sy bloed van al ons sondes wil reinig. Die Heilige Gees wat in ons harte wil woon en ons gedagtes wil nuut maak.
Maar hoe werk die belofte? Soms dink mense daaraan soos aan ʼn voorspelling. Dis nie ʼn voorspelling nie. Nee, dit werk meer soos ʼn aanbod. God sê Hy sal dit gee, maar jy moet dit uit sy hand vat.
Nou is die volgende vraag:
2. VIR WIE BELOWE HY HIERDIE NUWE LEWE?
Die dag daar in Jerusalem toe die Heilige Gees uitgestort is, het God se belofte aan Abraham ten volle in vervulling gegaan. Daarom praat Petrus met die Jode, die nageslag van Abraham. Maar nou verander die mense aan wie God sy belofte maak. Die belofte gaan nou na alle volke tale en nasies toe. Dit gaan nou nie meer net oor Israel wat die belofte gekry het nie, maar almal wat die woord hoor en hulle laat doop. Ook almal wat daar ver is, almal wat die Here ons God na Hom toe sal roep. Hulle en hulle kinders is geregtig op die belofte.
Dit is juis op grond van hierdie belofte wat God gemaak het, dat hier langs die Krokodilrivier ʼn gemeente ontstaan het. God se belofte aan ons voorouers wat Hy geroep het.
En ons voorouers hier het daardie belofte van God aangegryp en dit deur ʼn ware geloof vir hulleself toegeëien. Hulle het hulle kinders met die belofte grootgemaak en opgevoed om verbondskinders te wees. God se volk! In hierdie gemeente is ons geslagte lank geborge in Christus.
3. WAT BETEN SY BELOFTE VIR ONS?
In die eerste plek beteken dit dat ons kinders van God is. Hoe voel dit om kind van God te wees? Ons is nie ʼn klomp indiwidue wat elkeen op ons eie koers die lewe instorm nie. Nee, omdat ons kinders van God is, lewe ons op grond van sy belofte.
· Hy is ons Vader, daarom dank ons Hom voor elke ete vir die kos wat Hy vir ons gee. Ons dank Hom elke dag vir die lewenskrag en die geleenthede wat Hy vir ons gee.
· Hy is in en deur ons Here Jesus Christus ons Verlosser, daarom gryp ons aan Hom vas en beleef dan hoe ons van ons sonde, die satan en die dood bevry word.
· Hy is deur sy Gees daagliks besig om ons heilig te maak. Ons al hoe meer te maak soos Christus. Ja, Hy moet meer word en ons minder.
In die tweede plek beteken dit dat ons ʼn taak het. Omdat ons as verbondsvolk lewe, ja omdat ons nuwe mense is wat skoon gewas is met die bloed van ons Here Jesus Christus, gaan ons uit om ʼn verskil te maak in die wêreld waar ons leef. Ons opdrag is om uit te gaan en mense dissipels van ons Here Jesus Christus te maak. Ons taak is om sout te wees en lig te wees.
Onthou lig werk net waar dit donker is. Ons moet uit die ligkring van die gemeente uitbeweeg na die donker in die wêreld om daar te gaan lig maak. Ons moet sout wees wat uit die soutpot uitkom om smaak te gee en bederf teë te gaan.
SLOT
As ons more aan die Nagmaalstafel aansit, gaan ons opnuut die versekering kry dat God se belofte van heil vir ons bedoel is. Ons gaan opnuut ervaar dat ons kinders in God se huishouding is. Ons gaan opnuut die opdrag ontvang om uit te gaan en ʼn verskil te gaan maak.
AMEN.
