1. HY TEL DIE WAT IN DIE STOF Lê OP
Soms kan die lewe jou so aftrek dat dit vir jou voel of jy in die stof en modder lê. En jy kan net nie opkom nie! Sodra jy probeer opstaan, kom daar weer ʼn vlaag wind of ʼn stortbui reën wat jou eenvoudig weer platdruk en die modder in jou gesig laat spat.
As ʼn loot so in die grond lê, is daar nie ʼn kans dat hy vrugte kan dra nie. Die boer moet baie spesiale aandag aan so ‘n loot gee om hom te help om te herstel sodat hy vrugte kan dra.
Maar nou moet ek net eers u gedagtes ʼn oomblik onderbreek. Ons sit hier in ons teksvers ongelukkig met ʼn vertaalprobleem. Kyk hier staan in vers 2: Elke loot aan My wat nie vrugte dra nie, sny Hy af.... Die Griekse woord wat hier met afsny vertaal word, word op ander plekke in die Bybel met optelof dra of wegneemvertaal. So lees ons die dissipels het, nadat die Here Jesus die 5 000 mense kos gegee het, 12 mandjies oorskiet opgetel. Dieselfde woord word gebruik toe Simon van Sirene die Here Jesus se kruis moes dra. En Johannes die Doper het gesê dat Jesus die Lam van God is wat die sonde van die wêreld sal wegneem
Die Here Jesus sê vir sy dissipels: Elke loot aan My wat nie vrugte dra nie.... Dit gaan dus oor iemand wat in Christus is, wat deur ʼn ware geloof in Hom ingelyf is. Dit is ʼn loot wat aan die wingerdstok vas is, maar nie vrugte dra nie. . ʼn Beter vertaling van ons teksvers is dus: Elke loot aan My wat nie vrugte dra nie, tel Hy op. Hy maak so ʼn loot skoon. Hy neem die stof en modder weg en maak die loot netjies aan die prieel vas sodat dit ondersteun word om nie weer af te sak nie.
Is jy dalk so ʼn loot? Het die lewe jou plat gedruk sodat jy in die stof lê? Het mislukking of hartseer of siekte die modder op jou laat spat? Is jou finansies soos ʼn stoflaag oor jou blare sodat jy nie asem kry nie? Het jou huwelik jou lus om vrugte te dra geknou? Laat jou kinders of jou kollegas by die werk jou blare verlep?
Jesus sê ons hemelse Vader sny nie ʼn loot wat afgesak het en plat in die grond lê af nie. Nee, Hy tel jou op en maak jou skoon en maak jou hoër op aan sy prieel vas. Hy wil hê jy moet vir Hom vrugte dra.
Maar geliefdes, daar is nog ander lote aan die wingerd. Wat doen Hy met hulle?
2. HY SNOEI DIE LOTE WAT MIN VRUGTE DRA, REG
Wat is hier die probleem? Hy gepraat nou nie van lote wat geen vrugte kan dra nie. Nou praat die Here van lote wat wel vrugte dra, maar nie genoeg nie!
In ʼn wingerd moet daar baie snoeiwerk gedoen word om elke loot sy volle potensiaal te laat produseer.
Wat moet weggesny word? As jy na ʼn boer kyk wat lote of ranke regsnoei, sal jy hom wil keer. Op ʼn stadium sny hy klein druiwetrossies af! Te veel aan ʼn loot belemmer sy produksie!
Ek of jy is dalk ʼn loot wat te veel dinge in ons lewe het wat onnodig energie gebruik en ons aandag verdeel. Dit is dinge wat in die pad van jou diensbaarheid staan. Waarom kla ons altyd oor hoe besig ons is? Ons het te veel hooi op die vurk! Dinge soos geldgierigheid of ʼn slegte gewoonte moet weggesnoei word.. Verkeerde vriende of ʼn verslaafdheid aan jou beroep staan in die pad van jou produktiwiteit. As jy ʼn plesierjagter is of sommer net te selfgesentreerd lewe, kan snoeiwerk baie noodsaaklik wees.
Die Here ontleed ons elkeen se lewe en Hy snoei al sulke slegte gewoontes en dinge wat jou aandag verdeel of waarop jy jou krag vermors uit jou lewe uit. As Hy jou snoei, is dit ongemaklik, ja, dit is seer!
Ons het mos in Hebreërs 12 gelees:
My kind, moet dit nie gering ag as die Here jou tug nie en moenie mismoedig word as Hy jou teregwys nie, want die Here tug Hom wat Hy liefhet, Hy straf elkeen wat Hy as kind aanneem.
Ons is die Here se kinders en as ons met ons ongehoorsaamheid of eiewilligheid en selfgesentreerdheid ons toekoms in gevaar stel, tree Hy op!
Soms is ʼn mens vir maande of selfs jare lank ongelukkig en terneergedruk. Jou lewe kry net nie koers nie. Jou huwelik wil nie werk nie of jou finansies bly in ʼn toestand. Dit is wanneer die Here besig om jou te dissiplineer. Solank jy aan verkeerde dinge vasklou of bepaalde sondes bly koester, sal Hy jou dissiplineer. Hy hou aan tot jy is waar Hy jou wil hê. In Hebreërs 12 sien ons hoe sy snoeiwerk in intensiteit toeneem:
· Hy begin met ʼn teregwysing. Dit beteken daar word gepraat. As jy luister en regmaak, is die probleem opgelos. Maar as jy nie reageer nie, moet jou hemelse Vader strenger optree.
· Daarom volg daar die tug. Dit is beteken om te dissiplineer. Die kind wat nie na ʼn teregwysing reageer nie, word nou gedissiplineer. Hy word, sê maar, na sy kamer toe gestuur.
· Die ernstigste optrede volg wanneer niks anders meer help nie. Dit is staf. Ja, ʼn goeie pakslae is die laaste uitweg!
Waarom gaan ons hemelse Vader tot hierdie uiterstes?
3. HY WIL Hê ONS MOET MEER VRUGTE DRA
Die Here het ons mos verlos en met ʼn ware geloof aan ons Here Jesus Christus verbind, sodat ons vrugte sal dra. In vers 8 sê ons Here Jesus:
My Vader word juis daardeur verheerlik dat julle baie vrugte dra en my dissipels is.
Met voorbereiding vir nagmaal, is selfondersoek mos juis die saak wat op die tafel is. Ons moet elkeen na ons eie lewe kyk en persoonlik ons gesindheid ondersoek.
Dan moet ons onsself afvra:
· Wat is die vrugte waarmee u ons hemelse Vader verheerlik?
· Wat doen ek om sy koninkryk uit te brei?
· Op watter manier is ek vir Hom ʼn getuie? By die werk? In die skool? Tussen my vriende? By familie?
· Ja, watter verskil maak ek aan die omgewing waar ek lewe? Verdryf ek die sondeduisternis met my lig? Is ek sout wat smaak gee en die bederf teenwerk?
· Beleef mense die liefde en vergewensgesindheid van die Here Jesus as hulle met my te doen kry?
Ons is aan ons Here Jesus Christus verbind met die uitsluitlike doel om vir ons hemelse Vader vrugte te dra.
Genadiglik word ons nie aan ons eie kragte oorgelaat om dit te doen nie. Ons Here Jesus is die wingerdstok. Ons is die lote wat aan Hom verbind is. Sodoende ontvang ons sy Gees, die Heilige Gees. Daarom praat die apostel Paulus van die vrug van die Gees in ʼn gelowige se lewe.
SLOT
As ek en jy met ʼn ware geloof aan ons Here Jesus Christus vashou en positief reageer op die liefdevolle versorging van ons hemelse Vader, ja selfs as ons gesnoei word, dan sal ons baie vrugte dra en sodoende ons hemelse Vader verheerlik.
AMEN.
