1. BLY IN MY
Bly in Mysê die Here ... want sonder My kan julle niks doen nie.
Wat dink u beteken dit om in die Here Jesus te bly? Die Griekse woord, wat hier gebruik word, se basiese betekenis is om in ʼn huis te woon. Dit gaan oor jou woonplek. Daar waar jy tuis is en veilig voel. As die Here Jesus sê dus dat elkeen van ons in Hom moet bly, beteken dit dat ons geestelik by Hom sal intrek. Hy moet ons huis, ons woonplek wees!
Maar kom ons word nou prakties. Wat dit beteken om in ons daaglikse lewe in die Here Jesus te bly?
Kom ons sê eers wat dit nie beteken nie. Dit beteken nie dat jy vreeslik baie van die Bybel en geloof en die kerk hoef te weet nie.
Wat beteken dit wel? As jy in die Here Jesus Christus bly of in Hom woon, beteken dit dat jy na Hom soek, na Hom verlang, vir Hom wag, Hom sien, Hom ken, Hom liefhet, na Hom luister en op Hom reageer.
Dit gaan oor ʼn lewende verhouding met Hom as persoon. Jy bly immers saam met Hom! En omdat jy en die Here Jesus so saam woon, weet Hy presies wat jy dink en doen en voel. En op jou beurt weet jy ook baie goed wat Hy dink en doen en voel.
Weet u? Dit is nou presies wat ons vanoggend weer hier aan die tafel gaan beleef! Ons gaan sy teenwoordigheid ervaar. Hy gaan ons deur sy Heilige Gees met sy liggaam en bloed voed en versterk! Ons wys en beleef ons eenheid met Christus en ook met mekaar.
Die Here Jesus gaan elkeen van ons wat hierdie nagmaal met ʼn opregte hart vier, innerlik voed en versterk sodat ons baie vrugte vir ons hemelse Vader kan dra.
Onthou, ons het aan die begin gesê dat die Here Jesus ʼn opdrag gee: Bly in My. In die 8 verse wat ons saam gelees het, sê die Here Jesus 10 keer dat ons in Hom moet bly! Dit is bepaald vir Hom baie belangrik is dat ons in Hom moet sal bly.
2. HOE VOER ONS SY OPDRAG UIT?
Wanneer ek en jy verstaan hoe geweldig groot sy liefde vir ons is en hoe Hy sy lewe met ons wil deel, soos die wingerdstok sy sap met die lote deel, het ons al die eerste belangrike stap geneem. En dan verstaan ons uiteraard ook meer van vandag se nagmaal.
Om in Hom te bly, het egter met meer as die nagmaal te doen. Dit gaan oor ʼn verhouding.
Ons verhouding met Hom word duidelik uit ʼn leefwyse waar ons daaglikse Bybellees en bid ʼn wesenlike deel van ons dagprogram uitmaak. Maar nou mag dalk vir baie van ons ʼn skok wees as ons uitvind dat ʼn mens vir jare lank kan Bybellees en bid sonder om in Hom te bly.
Dit gaan oor HOE jy Bybellees en bid!
Jy kan Bybellees byna soos om ʼn outobiografie van ʼn persoon te lees sonder om die persoon wat die boek geskryf het regtig te ken. Dan bly net ʼn verstandsding wat eintlik niks met jou hart te doen het nie. Jy weet alles wat jy gelees het, maar dit het niks met jou hart te doen nie.
Net so kan ʼn mens ook bid, sonder dat dit uit jou hart uit kom. Ons tafelgebede is dikwels van so ʼn aard. Jy sê so ʼn bekende rympie uit gewoonte op, maar dink nie eers werklik oor dit wat jy sê nie.
Om in die Here Jesus te bly, beteken om deur sy Woord en Gees gevoed te word. Ons Bybellees en gebed moet in die ware sin van die Woord ʼn daaglikse, bewustelike en opbouende gesprek tussen ons en die Here wees. Ons moet met Hom praat soos omdat ons Hom persoonlik goed ken en omdat ons Hom liefhet en Hom vertrou. Sodoende groei ons in ons verhouding met Hom! En dan sal ons, so belowe die Here Jesus
3. BAIE VRUGTE DRA
Onthou, vrugte groei op ʼn natuurlike wyse uit die plant. Omdat die lote aan die wingerdstok vas is, en die lewensap vanuit die wingerdstok in die lote invloei, verskyn daar vrugte.
Hoe beter die verbinding met die wingerdstok, hoe beter is die oes aan die loot!
Onthou u? Verlede week met voorbereiding het ons gehoor dat ons hemelse Vader ons reg snoei sodat ons meer vrugte kan dra. Hy werk met elkeen van ons persoonlik, want Hy is soos enige goeie boer nie tevrede met ʼn bietjie vrugte nie. Hy wil ʼn goeie oes hê. En by ʼn wingerdstok is snoeiwerk, selfs in die groeiproses aan elke indiwiduele loot van die uiterste belang.
Vandag drink ons hier aan die Nagmaalstafel wyn wat uit die oes van ʼn wingerdstok gemaak is om ons daaraan te herinner dat ons deel het aan die ware wingerdstok Jesus Christus.
Die Here Jesus wys ons op die feit dat ons net soos lote nie op ons eie kan vrugte dra nie. Ons moet in Hom bly, dan kan ons baie vrugte dra en ons hemelse Vader verheerlik.
SLOT
Hier aan die Nagmaalstafel beleef ons die hegte eenheid met ons Here Jesus Christus. Ons ervaar die werking van die Heilige Gees wat die ware lewe van Christus in ons laat invloei. Ja, ons kry weer nuwe krag om uit te gaan en vir ons hemelse Vader vrugte te gaan dra.
AMEN.
