Kom ons kyk na
2. DIE OPENBARING
Soos ons alreeds gesê het, het Petrus die Here Jesus op hierdie stadium al redelik goed geken, soveel so dat hy tog teen alle redelikheid in, bereid was om te doen wat Jesus gesê het.
Onthou Petrus was ʼn visserman van beroep. Hy het visvang geken. Die vorige nag het hulle die hele nag deur geswoeg sonder om iets te vang. Hulle was moeg en teleurgesteld. Hulle wou hulle nette gereedmaak en dan huis toe gaan om te rus sodat hulle die volgende nag weer kan gaan probeer om vis te vang.
Die Here Jesus was nie ʼn visserman nie. Toe hy dus vir Petrus sê om na die diep water te vaar en weer sy nette uit te gooi, doen hy dit tog omdat hy ʼn bewondering vir Jesus gehad het. Hulle vang toe soveel vis dat hulle dit nie kon hanteer nie. Hulle moes hulle maats roep om te kom help!
Jesus het Homself hier op ʼn besondere praktiese manier aan Petrus geopenbaar. Binne sy veld as beroepsvisserman, wys die Here Jesus aan Petrus dat Hy almagtig en alwetend is. Hy wys dat Hy God is, want hy het beheer oor die visse in die see.
Toe die Here Jesus op so ʼn praktiese manier aan Petrus getoon het Wie en Wat Hy is, kom daar ʼn verandering in Petrus se lewe.
Ja, hier kom toe die draaipunt. Petrus val in aanbidding op sy knieë. Nou kyk hy met ander oë na Jesus. Voorheen het hy Jesus as “meneer” aangespreek, maar nou noem hy Hom “Here”!
Petrus is nou
3. DIE DISSIPEL
Toe Petrus daar van sy knieë af opstaan, is hy ʼn ander mens. Hy is nou nie net meer ʼn bewonderaar nie. Hy is nou ʼn dissipel van Jesus.
Hy besef nou dat Hy nie maar net met ʼn besondere mens te doen het nie, maar met die Here. Petrus en sy mede-vissers was almal stom verbaas oor wat gebeur het. Hulle was sprakeloos.
Luister wat sê die Here Jesus dan vir Simon Petrus: Moenie bang wees nie. Van nou af sal jy mense vang.
As die Here Jesus mag het oor die visse in die see, dan het Hy ook mag oor die mense op aarde.
En dan gebeur daar ʼn merkwaardige ding. Hier staan in vers 11: En nadat hulle die skuite op die strand getrek het, het hulle alles net so laat lê en sy volgelinge geword.
Petrus en sy vriende hier van bewonderaars verander na dissipels. Hulle het volgelinge of te wel navolgers van die Here Jesus geword. Die woord dissipel beteken om ʼn navolger of ʼn leerling van iemand te word.
En ja, ʼn dissipel is iets anders as ʼn bewonderraar. ʼn Bewonderaar gaan kyk of luister graag wanneer die persoon wat hy bewonder iewers optree. Na die optrede gaan die bewonderaar weer huis toe en gaan met sy gewone lewe voort.
ʼn Dissipel is egter iets anders. Nadat iemand ʼn dissipel geword het, verander sy lewe op ʼn wesenlike en praktiese manier. ʼn Dissipel is ʼn nuwe mens met ʼn nuwe lewens benadering. Petrus en sy mede-vissers het alles net so laat lê. Hulle het hulle ou lewe agter hulle gelos. Hulle het Jesus se se volgelinge geword.
Broeders en susters. Dissipelskap is iets wat diep in jou lewe insny, dit raak jou diepste opvattings en benaderings. Dit verander jou ou vooroordele, wysig selfs jou lewensgewoontes wat jy nie so maklik prysgee nie. Dissipelskap druis in teen jou ou vaste gebruike en oorwegings ..... dit staan dikwels selfs teenoor sogenaamde nugtere redenasie, lewenservaring en skynbare realiteite.
Van hierdie dag af, het Petrus en sy mede-vissers se lewens radikaal verander. Hulle het die pad saam met die Here Jesus begin loop. Die pad was nie maklik nie. Dit het reuse opofferings geverg. Onthou hierdie manne het beroepe en huise en gesinne gehad. Hulle het alles net so gelos!
Om dissipels van ons Here Jesus te wees, beteken nie vandag dat ons almal in die kerk alles moet los en net op die sendingveld gaan werk nie. Wat wel van ʼn dissipel van die Here Jesus verwag word, is om ʼn nuwe lewensbenadering te volg. Ons moet onsself, so sê Paulus, as lewende en heilige offers aan Hom gee. Ons lewe moet op Hom gefokus wees en nie op onsself of op die dinge van die wêreld nie.
SLOT
Geliefdes, ʼn bewonderaar se lewe word nie deur die een wat hy of sy bewonder, verander nie. Daarteenoor word ʼn dissipel se lewe geheel en al deur die een wat Hy volg bepaal. Paulus sê met groot vrymoedigheid: Word my navolgers, want ek is ʼn navolger van Christus. Hy sê ek reken alles, alle ander dinge op aarde as waardeloos, want om die Here Jesus te ken en Hom te volg oortref alles in waarde. Hy sê dat Hy die Here Jesus Christus as sy enigste bate sien.
Is ek en jy bewonderaars of is ons dissipels?
Amen.
