Die probleem, broeder en suster, is:
2. DIE DEUR IS SMAL
Jesus vergelyk die koninkryk van God met 'n huis wat net een deur het. Mense word geroep om in die huis in te gaan, want die deur gaan op 'n sekere tydstip gesluit word.
Hierdie deur, sê Jesus egter, is smal. Mense moet een-een of twee-twee ingaan. Dit verg inspanning.
Op ʼn ander plek (Joh. 10), sê die Here Jesus dat Hy die ingang na die koninkryk is. Hyself is m.a.w. die deur. Jy kan net deur Hom alleen ingaan. Daar is nie nog ʼn deur nie en boonop is die deur smal. In Matt. 7:13 sê die Here Jesus:
Gaan deur die nou poort in. Die poort wat na die verderf lei, is wyd en die pad daarheen breed, en dié wat daardeur ingaan, is baie. Maar die poort wat na die lewe lei, is nou en die pad daarheen smal, en dié wat dit kry, is min.
· As jy deur die Here Jesus, die smal deur, in die koninkryk wil ingaan
· Kan jy nie met jou motor daar inry nie
· Kan jou afkoms nie jou toegangskaartjie wees nie
· Ook kan jy nie met jou plaas of besigheid deurgaan nie.
· Jou aansien of geleerdheid kan ook nie deur die deur kom nie.
· Al hierdie dinge word in die proses om met inspanning deur die deur te kom, van jou afgestroop!
· Dit gaan eenvoudig daaroor dat jy in ʼn persoonlike en lewende verhouding met die Here Jesus staan.
Die Here Jesus verander mos ʼn mens se hele lewe! Hy was jou sonde met sy bloed af. Hy gee aan jou sy Gees sodat jy onder leiding van die Heilige Gees wedergebore word. Dan lewe jy ʼn nuwe lewe. Dan gaan dit nie meer oor wie jy is nie, maar oor wat jy doen!
Die Here Jesus sê: Op die laaste dag sal mense aan die toe deur staan en klop en roep. Hulle sal sê: “Ons het saam met U geëet en gedrink, en op ons strate het U die mense geleer”. Maar Hy sal vir hulle sê: “ Ek weet nie waar julle vandaan kom nie. Niemand van julle het gedoen wat reg is nie”.
Al ons eie pogings is tevergeefs. Al die maniere waarop ons probeer om op ons eie manier godsdienstig te wees, is ʼn gejaag na wind. Al die mensgemaakte reëls en tradisies is hindernisse wat jou terughou, sodat jy nie deur die deur kan kom nie! Eers wanneer die Here Jesus beheer van jou lewe geneem het, is jy op die regte pad. Hy moet jou reinig. Hy moet jou lewe nuut maak. Hy verander jou in jou wese.
Ja, daar is baie mense naby die deur. Daar is baie mense in die Here Jesus se omgewing. En op die laaste dag sal hulle meteens besef hulle was net naby en dan sal hulle gelyk storm om in te gaan, maar dan sal dit te laat wees! In die chaos gaan die deur voor hulle oë toeklap! Dan sal dit nie help om te klop en te roep en te sê jy het die Here Jesus geken nie. Om Hom net te ken help niks nie. Hy verwag dat jy sal doen wat reg is. En jy kan net doen wat reg is, as jy aan Hom verbind is, in Hom ingelyf is. Dit gebeur net deur ʼn ware geloof. En ware geloof is nie praatgeloof nie - Dit is doen geloof!
Daarom sê Jesus
3. DIE WAT INGAAN, IS MIN
Die Here Jesus sê: Span al julle kragte in om by die smal deur in te gaan.. Om jou voortdurend in te span is moeilik. Om gedurig met 'n geveg besig te wees is veeleisend. Hierdie geveg is teen ons dodelike vyande: Die Satan, die wêreld en my eie sondige natuur!
Ja, hierdie geveg is 'n stryd - ook teen jouself!
Die meeste mense gaan verlore omdat hulle ewe gemaklik saam met die breë stroom drywe. Hulle doen die dinge op die gemaklike manier. Hulle dink hulle is gelowiges. Hulle is in die kerk, hulle gee darem ʼn bydrae en woon darem eredienste by. Maar dit is min of meer al.
Sulke mense weerstaan nog die Heilige Gees wat hulle wil nuut maak. Hulle is nog gelowiges op hulle eie voorwaardes en terme. Hulle is nie bereid om werklik ʼn tiende van hulle inkomste as dankoffer te gee nie en is ook nie bereid om opofferings te maak om die Here se koninkryk uit te brei nie. Hulle wil naby die Here lewe, maar wil nie doen wat reg is nie!
Onthou wat Jakobus in sy brief skryf: ʼn Geloof wat nie tot dade kom nie, is ʼn dooie geloof! En so ʼn dooie geloof kan ʼn mens nie red nie!
Sulke mense wat nog nie deur die smal deur, Jesus Christus ingegaan het nie, hulle wie se lewe nog nie in wese verander het nie, staan nog buite! Hulle is naby, maar nie binne-in nie! Hulle sal op daardie laaste dag huil en op hulle tande kners. Hulle sal die ware gelowiges binne-in die koninkryk sien, maar hulle sal self buitentoe weggejaag word!
Broeders en susters. Ons lewe nog in genadetyd. Die deur is nog oop. Die Here Jesus roep nog: “Kom na My toe almal van vermoeid en belas is. Ek sal julle rus gee"
SLOT
Geliefdes, God se genade is groot, maar sy genade is nie goedkoop nie. Ek en jy word nie sommer maar outomaties gered nie. God vergewe ook nie maar sommer net outomaties jou sondes nie.
Die enigste pad van verlossing is die pad deur die smal deur naamlik Jesus Christus. Hy alleen is die weg en die waarheid en die lewe.
Dit is die pad wat ons moet loop, is ʼn pad wat inspanning vereis. Dit is die pad wat verby die kruis en verby die graf van die Here Jesus Christus loop.
Dit beteken dat ek en jy saam met Hom moet sterf en ook saam met Hom in 'n nuwe lewe moet opstaan!
Broeder, suster: Waar staan jy vandag? Het jy al deur die smal deur gestap of staan jy net so naby die deur, maar nog steeds buite?
AMEN
